2025 жылғы 18 қарашада Көкшетау қаласында әл-Фараби атындағы IT мектеп-лицейінің оқушыларымен кездесу өтті. Шараны Ақмола облыстық АИТВ-инфекциясының алдын алу орталығының мамандары «Panacea clinic» ЖШС-ның Жастар денсаулық орталығымен бірлесіп ұйымдастырды.
Іс-шараның спикері, АИТВ орталығының эпидемиолог дәрігері- Балғын Сарбасова жастарға АИТВ-инфекциясының алдын алу және жыныстық жолмен берілетін инфекциялар туралы ақпарат берді.
«Бүгінде АИТВ-инфекциясының тіркелуі іс жүзінде барлық жас топтарында байқалады, оның ішінде жасөспірімдер мен 29 жасқа дейінгі жастар да бар. Сондықтан олардың хабардарлығын арттыру - жастар денсаулығы орталықтарымен бірлескен жұмысымыздағы басым бағыттардың бірі», - деп бөлісті Балғын Рахимовна.
Естеріңізге сала кетейік, 2025 жылдың 10 қарашасынан бастап Ақмола облысында Дүниежүзілік ЖИТС-пен күрес науқаны басталды. Оның аясында түрлі ақпараттық-білім беру іс-шаралары жоспарланған. Соның ең ауқымдысы - «Көкшетау» Мәдениет сарайында өтетін кең көлемді жастар акциясы.
