2025 жылғы 20-22 мамыр аралығында Ақмола облыстық АИТВ-инфекциясының алдын алу орталығы мамандарының бригадасы Есіл және Жақсы аудандарына жұмыс сапарымен барды.
Ағымдағы жылдың алғашқы төрт айында бұл аудандарда АИТВ-инфекциясының 4 жаңа жағдайы тіркелді. Олардың барлығы қорғалмаған жыныстық қатынасқа байланысты. Бұл тұрақты алдын алу жұмыстың және халықтың да, медицина қызметкерлерінің де хабардарлық деңгейін арттырудың маңыздылығын көрсетеді.
Сапардың негізгі мақсаты-жергілікті жерлерде мамандарға тәжірибелік және әдістемелік көмек көрсету. Орталық дәрігерлері Қазақстан Республикасында 2023-2026 жылдарға арналған АИТВ-инфекциясының алдын алу шараларын іске асыру жөніндегі Жол картасына сәйкес, медицина қызметкерлерін оқытты. Сондай-ақ АИТВ-ға жедел тестілеу әдістемесі бойынша тәжірибелік сабақ өткізілді.
Оқуда АИТВ-мен өмір сүретін адамдарға қатысты стигма мен кемсітушілікті жеңу, жүктілік, босану және емшек сүтімен емізу кезінде АИТВ, мерез және С вирустық гепатитінің берілуінің алдын алу, сондай-ақ мұндай пациенттерді уақтылы тексеру және емдеу, соның ішінде қатар жүретін аурулардың терапиясы мәселелеріне ерекше назар аударылды.
Сонымен қатар, АИТВ-мен өмір сүретін адамдарға диспансерлік қарау және тексеру жүргізілді.
